Ansprache von Inge Gieppner-Carstensen, Tinnumer Biike 2018

Lef Sölring, lef Gasten fan nai en fiir, bi die Biiki 2018 jir bi Tinnem-Borig röp ik juu en "Hartelk Welkemen" tö.

Sent fuul hönert Jaaren finj jam di Mensken üp üs Ailön di 21. Februwaari töhop, om me arküder di Biiki öntötjenen.

Wü stuun jir ek muar, om God Wedon to iaren, uk ber wü ek muar om en gur Baricht en sii uk ek Fawel tö di Seelir, diar ütfangung. Man wü weet, dat di Wunter nü ön't Gungen es, en di Uars kum wel!

Fuul heer höm foranert ön di Loop fan di Tiren. Jer waar jir Ting ofhölen, hat waar aur Rocht en Ünrocht befünen, en hat waar diaraur rat, wat mesken üders of beeter maaket uur kür. Dit es wat, wat uk ön des Tir muar üüs nöörig es.

Üs Warel lapt, sa teenk ik, manigmol wat ütarküder - enkelt mensken haa sa ünskeks fuul Macht - en uk fuul Jil! En sa gung ja uk diame om! En di gurt's Diil fan danen, diar ar nönt haa - nönt tö iiten en niin Taak aur Haur! uur diarbi auriiten.

Wan wü üs dir fuar Oogenhual, da lewi wü jir ön üs Lön en fuaral jir üp üs ailon Söl dach jit üp en rocht gut Plak fan üs Öört!

Strir, Spiktaakel en Ünrocht kumt uk jir bi üs fuar, man hat liit bi üs - arkenjen fan üs - dat wü üs weder forliki, me arküder snaki, en töhopstuun - biarküder en mearküder - en üs Mait dö, fuar en gur Fuararküder tö sörifen. Ual en jung, rik en arem, arkenjen me ne litj Stööp, sa gur üüs wü dit ken. Aur üt fuul litj Stööpen ken en lüng Wai uur.

Dit es üüs me di jest litj Stiin, wat seet uur bi't Bechen. En üt jen Stiin üp de üder ken da en gurt Hüs uur.

Fuul Freemern sen ön di Loop fan dir Jaaren jir üp Söl tötain en haa jir jaar Itüüs fünen en dit es uk gur sa, wan wü mearküder forliki en fuararküder diar sen.

Man bi al dit mut wü diarfuar sörigi, dat üs Sölring Aart en wiis, üs Kultur e n üs Spraak ek forleesen gair - dat et üs bihölen bleft - en dit Biikibrenen es jen Diil diarfan.

En diarom let üs dit jir Injung bi di Tinnum-Biike lööwi:
- biarküder, mearküder, fuararküder - me en "Rüm Hart en en klaar Kimming."

Wan wü dit skafi, da sen wü üp en gur Wai, dat dit Biikibrenen üs jit lung bihölen bleft en üs jir töhopföört! Aur da ken wü jit lung mearküder üt ful Hart sung:
Üs Sölring Lön, dü best üs helig
dü blefst üs Ain, dü blefst üs Lek!

En nü altermal töhop!